Турсунбековдун Жалал-Абаддагы иш сапары Токтогул районунан башталды

Жогорку Кеңеш 0

Бишкек, 05.10.17 /Кабар/. Кыргыз Республикасынын Жогорку Кеңешинин Төрагасы Чыныбай Турсунбековдун Жалал-Абад облусундагы эки күндүк иш сапары Токтогул районунун Кара-Суу айылында жайгашкан Т.Казатов атындагы орто мектептин абалы менен таанышуудан башталды. Бул тууралуу ЖК басма сөз кызматы билдирди.

Билим берүү мекемесинен мугалимдер жамааты менен жолугушкан Төрага Чыныбай Турсунбеков аларды келе жаткан кесиптик майрамы менен куттуктап: “Мугалим окуучуларды келечекке багыттаган улуу инсан. Биз баарыбыз силерден тарбия алып, силерден таасирленгенбиз. Силердин айткан ар бир сөз эзели эсибизден кетпей, жашообузга жарык берип келет”, – деди.

Ошондой эле, мектептин абалына токтолгон Чыныбай Турсунбеков: “Силердин мектеп өтө начар абалда экенине күбө болдук. Ичи-сырты эскирип, окуучулардын толук шартта билим алуусуна тоскоолдуктар жаралып жатыптыр. Муну тез арада чечүү зарыл. Анткени, заманбап шартта билим алуу учурдун таасын талабы”, – деди. Буга кошумча Төрага, КР Өкмөтүнө караштуу Архитектура, курулуш жана турак жай – коммуналдык чарба мамлекеттик агенттигинин өкүлүн маселени эртелетип чечүүгө чакырды.

Белгилүү болгондой, Т.Казатов атындагы орто мектептин жаңы имаратынын курулушу 2015-жылы башталып, бирок убактылуу токтоп калган. Андан тышкары, курулушу 70%дан жогору даяр болуп калган мектептерди бүткөрүү талабына ылайык бул мектеп быйылкы жылдын эсебине да киргизилген эмес. “Андыктан кийинки жылы ушул мектепти капиталдык салымдар тизмесине кошобуз”, – дейт КР Өкмөтүнө караштуу Архитектура, курулуш жана турак жай – коммуналдык чарба мамлекеттик агенттигинин өкүлү.

Мындан сырткары, жамаат менен болгон жолугушуунун соңунда аталган мектептин директоруна материалдык жардам тапшырган Чыныбай Турсунбеков, сыйлык катары алдыңкы мугалими ЧанкиловАбдыбекке Төраганын атайын кол саатын тапшырды.

Пикир

Оставить комментарий