Бишкек, 25.08.23./Кабар/. Тышкы иштер министри Жээнбек Кулубаев Германиянын Мамлекеттик катчысы, Федералдык президенттин администрациясынын жетекчиси Дёрте Дингер менен жолугушту.
КР ТИМден билдиришкендей, жолугушуу кечээ, 24-августта Берлин шаарында орун алып, Кулубаевдин Германияга иш сапарынын алкагында өттү.
Сүйлөшүүлөрдүн жүрүшүндө маектештер Германиянын Федералдык президенти Франк-Вальтер Штайнмайердин 2023-жылдын 22-23-июнунда Кыргызстанга болгон расмий сапарынын жыйынтыктарын эске алуу менен өз ара аракеттенүүнүн бардык чөйрөлөрүндө кыргыз-герман кызматташтыгынын маселелерин талкуулашты.
«Германиянын Федералдык президентинин сапары кызматташтыкты мындан ары чыңдоодо маанилүү роль ойноду, мамлекет башчыларынын ортосунда жеке байланыштар түзүлдү, бул биздин мамилелерди өнүктүрүү үчүн абдан маанилүү. Биз Германия менен бардык багыттар боюнча мындан ары да активдүү байланыштарды чыңдоого ниеттенебиз», - деди Жээнбек Кулубаев баш сөзүндө.
Мамлекеттик катчы Дёрте Дингер да Германиянын Федералдык президенти Франк-Вальтер Штайнмайердин Кыргызстанга болгон сапарына оң баа берип, германиялык тараптын кызматташууну мындан ары тереңдетүүгө кызыкдар экендигин билдирди.
Тараптар Евробирликтин Борбордук Азия боюнча Стратегиясы жана "Жашыл Борбордук Азия" демилгесинин, ошондой эле айлана-чөйрөнү жана экологияны сактоого багытталган башка долбоорлордун алкагында мындан аркы иштердин маанилүүлүгүн белгилешти.
Өз кезегинде, Тышкы иштер министрлигинин башчысы Жээнбек Кулубаев Германиянын Европа бирлигиндеги маанилүү ролун жана эки өлкөнүн ортосундагы ийгиликтүү өз ара аракеттенүүнү белгиледи. Ал ошондой эле өлкөнүн тышкы карызынын ордуна реструктуризациялоо боюнча Германиянын инвестициясын тартуу үчүн «жашыл» долбоорлорду жана экономиканын келечектүү тармактарын ишке ашыруунун ордуна президенттин демилгесине токтолду.
Мындан тышкары, жолугушуунун жүрүшүндө Борбордук Азиядагы аймактык кызматташтык, эл аралык күн тартибиндеги негизги маселелер жана эл аралык уюмдардын алкагындагы өз ара аракеттенүү боюнча кеңири пикир алмашуу болду.
Жээнбек Кулубаев Германиянын тышкы иштер министри менен кол коюлган Кыргызстандын министрлер кабинети менен Германия өкмөтүнүн ортосундагы кызматташтыкты кеңейтүү боюнча биргелешкен ниет тууралуу билдирүүнүн маанилүүлүгүн белгиледи.
Жолугушуунун жыйынтыгында тараптар кыргыз-герман мамилелерин мындан ары кеңейтүү жана тереңдетүү максатында эки өлкөнүн ортосундагы саясий диалогду жогорку деңгээлде улантууга даяр экендиктерин билдиришти.
Пикир
Оставить комментарий