• 84.8
  • 102.34
  • 1.12

Араб өлкөлөрү Катардын жообуна «нааразы»

Дүйнө 0

Бишкек, 6-июль /Кабар/. Катар өз саясатын өзгөртмөйүнчө төрт араб өлкөсү Доха менен дипломатиялык жана экономикалык мамилелерин калыбына келтирбейт. Бул тууралуу шаршембиде аталган төрт араб өлкөсүнүн ТИМ башчыларынын Каирдеги жыйынынан кийин Сауд Арабиянын тышкы иштер министри Адель аль-Жубейр билдирди.

Анын айтымында, Катарга карата кошумча чаралар тууралуу жакынкы убактарда кабарланат.

Жолугушуунун катышуучулары тарабынан кабыл алынган биргелешкен билдирүүдө Катар террорчулук топторду колдоосун жана аймактагы өлкөлөрдүн ички иштерине кийлигишүүсүн токтотушу керектиги айтылат. Документте ошондой эле коюлган талаптар боюнча Катардын «терс жообу» аларды нааразы кылгандыгы жана бул ага карата араб өлкөлөрүнүн мамилесинин өзгөрүшүнө негиз болбостугу жазылган.

Коюлган талаптарды аткаруу үчүн Катарга берилген мөөнөт 5-июлда аяктаган. Алардын негизгилери – Иран менен кызматташууну токтотуу жана "Аль-Жазира" телеканалын жабуу болгон.

Шаршембиде Катардын тышкы иштер министри Мохаммед бин Абдул Рахман Аль Тани блокаданы эл аралык укуктарды бузган жана Батышта Дохага каршы терс маанайларды жаратууга багытталган "ачык агрессия" деп атаган. Бирок ошол эле маалда ал Катар мурдагыдай эле сүйлөшүүлөр үчүн ачык экенин белгилеген.

Июндун башында Сауд Арабиясы, Бириккен Араб Эмирлиги, Бахрейн жана Египет Катарды терроризмде колдоого айыптап, аны менен дипломатиялык жана экономикалык мамилелерин бузган. Андан сырткары Катарга бир канча талап коюлган. Бирок Доха алталаптарды аткаруу мүмкүн эмес экенин билдирген.

Пикир

Оставить комментарий