Бишкек, 28.01.23. /Кабар/. Ош облусуна караштуу Кара-Суу районундагы Нариман айыл аймагында эки киши октон жараат алып, ооруканага түшкөн. Бул тууралуу облустук милициянын басма сөз кызматынан билдиришти.
Маалыматка ылайык, окуя 27-январда болжол менен саат 19:15тер чамасында орун алган. Аталган маалымат Кара-Суу РИИБдин кылмыштардын бирдиктүү реестрине катталып, тергөө иштери башталган.
"Алгачкы териштирүүнүн жүрүшүндө маалым болгондой, Нариман айыл аймагындагы турак жайлардын бирине 30-35 жаштардагы белгисиз жарандар Mercedes-Benz Vito унаасы менен келип, үйдүн короосуна киришкен. Алардын жанында ок атуучу курал болгон. Үйдүн жашоочулары өздөрүнүн Toyota Land Cruiser 200 үлгүсүндөгү унаасын айдап чыгып баратканда, аларга ок чыгарышкан", - деп айтылат маалыматта.
Ошол эле күнү саат 22:11лер чамасында октон ич тарабына жана бутунан жараат алган 32 жаштагы М.А. жана 21 жаштагы Т.А. Ош шаардык ооруканасынын жандандыруу бөлүмүнө жаткырылган.
Аталган факты боюнча Кыргыз Республикасынын Кылмыш-Жаза кодексинин 207-берененин негизинде ("каракчылык") кылмыш иши козголгон.
Катталган окуя боюнча Кара-Суу райондук ички иштер бөлүмү тарабынан “Колго түшүрүү” жана “Чагылган” аталыштагы операциялары киргизилип, кылмышка шектүүлөрдү кармоо боюнча ыкчам-иш чаралар жүргүзүлгөн. Анын жүрүшүндө 27-январда саат 23:21 чамасында Mercedes-Benz Vito үлгүсүндөгү унаа Ош шаарынын Ош көчөсүндөгү Ак-Буура дарыясы аркылуу өтүүчү көпүрөнүн үстүндө токтоп турган жеринен табылып, далил буюм катары Ош ОИИБдин короосуна токтотулган.
Учурда изин жашырып качып кетишкен белгисиз жарандарды тактап, кармоо боюнча ыкчам иш-чаралар улантылууда.
Пикир
Оставить комментарий