Бишкек, 11.09.23. /Кабар/. Күн мурун Кыргызстан менен Кувейттин футбол боюнча улуттук курама командалары жолдоштук беттеш өткөрүштү. Оюн Дубайдагы "Севенс" стадионунда болду. Беттеш тараптардын макулдашуусу менен түз алып көрсөтүлгөн жок.
Жолдоштук беттеш 3:1 эсебинде аяктап, "Ак шумкарлар" жеңишке жетти.
Кыргызстандын футбол боюнча улуттук курамасынын машыктыруучусу Штефан Таркович оюндан кийин комментарий берип, улуттук команданын потенциалы жогору экенине ишене тургандыгын айтты.
"Биринчиден, футболчуларды абдан оор беттеште жеңиши менен куттуктайм. Жеңиш оңой болгон жок жана гол киргизгенибизде оюндун жыйынтыгын биз тарапка эрте буруш керек болду.
Биз сапаттуу командага каршы ойнодук. Кувейт сериядагы 12 беттеште жеңилбей, абдан татыктуу оюн көрсөтүүдө.
Биринчи тайм биз үчүн оптималдуу болбой калды, биз начар кыймылдадык жана өтө пассивдүү болдук.
Экинчи таймда кувейттик оюнчуларга жетиштүү басым жасап, аларды ката кетирүүгө мажбурлап, акыры жеңишке жетиштик (3:1).
Чындыгында, биздин команда 2 жылдан ашык убакыттан бери расмий беттештерде 3 гол киргизе элек жана ушул убакка чейин бизде оюнду жыйынтыктоодо кыйынчылыктар болуп келген. Жеңиш жана өзгөчө экинчи таймда оюндун жакшыруусу биз акырындык менен жакшырып бара жатканыбызды көрсөтүп турат.
Мен бул команданын потенциалы мындан дагы жогору экенине жана өзүбүздүн үстүбүздөн талыкпай иштөөгө, даяр оюнчулар менен бирге биз дайыма өнүгүүгө жетише алабыз деп ишенем", - деди башкы машыктыруучу.
Таркович октябрда "Ак шумкарларды" ноябрдагы дүйнөлүк чемпионаттын тандоо оюндарынын алдында акыркы даярдык жыйыны күтүп турарын кошумчалады.
"Ошол убакыттан баштап, U-23 оюнчулары жеткиликтүү болот, бул, албетте, командадагы моралдык рухту көтөрөт.
Күйөрмандар бизди колдоп келгени үчүн абдан ыраазымын. Алар бизге үйдө ойногондой сезим калтырышты. Аларга өзүмдүн жана оюнчулардын атынан ыраазычылык билдирем. Бирге, Алга Кыргызстан!", - деп сөзүн жыйынтыктады.
Пикир
Оставить комментарий