Бишкек, 10.06.21. /Кабар/. Өзбекстандын Наманган облусунан келген делегация Жалал-Абад шаарындагы өндүрүштүк жайлар менен таанышты. Бул тууралуу шаардык мэриянын басма сөз кызматы билдирет.
Маалыматка ылайык, кечээ Өзбекстандын Наманган облусунан Жалал-Абад облусуна 50 кишиден турган атайын делегация келген. Алардын арасында жергиликтүү бийлик өкүлдөрү, ишкерлер, маданият кызматкерлери жана журналисттер бар.
Эки өлкөнүн достугун бекемдөө жана ишкерлер арасындагы карым-катнашты жакшыртууну көздөгөн иш-чара эки күнгө созулат. Анын алкагында конокторго Жалал-Абаддагы өндүрүштүк жайлар тааныштырылып, Кыргызстандын баа жеткис байлыгы болгон жаратылышы, туристик жайлары да көрсөтүлөт.
Ал эми бүгүн Жалал-Абад шаарында "Жалал-Абад-Наманган 2021" бизнес форуму өтөт. Ага эки өлкөнүн ишкерлери катышып, бир топ келишимдерге кол коюлат.
Пикир
Оставить комментарий