• 84.8
  • 101.16
  • 1.14

Новиков: Өкмөт эпидемиялык абалга жооп кайтаруунун так планын даярдашы керек

Өкмөт 0

Бишкек, 22.01.21. /Кабар/. Премьер-министрдин жана биринчи вице-премьер-министрдин милдетин аткаруучу Артём Новиков саламаттык сактоо тутумундагы актуалдуу маселелер боюнча кеңешме өткөрдү. Бул тууалуу өкмөттүн аппаратынын маалыматтык камсыздоо бөлүмү билдирет.

«Коомчулукта саламаттык сактоо тутумунун иштөөсүнүн натыйжалуулугуна, ошондой эле коронавирус инфекциясын жоюу жаатында кабыл алынып жаткан чараларга, вакциналарды сатып алуу жана аны өлкөгө жеткирүүгө тийиштүү көптөгөн суроолор жаралууда. Мындан тышкары, Саламаттык сактоо министрлигинин Дары-дармек каражаттар департаментине суроолор бар. Күн сайын саламаттык сактоо тутумундагы чечимдерди даярдоодо иш-аракеттердин макулдашылбагандыгын байкоодобуз», - деди Премьер-министрдин милдетин аткаруучу Артем Новиков.

Анын айтымында, көзкарандысыз жумушчу топ саламаттык сактоо тутумундагы бир катар көйгөйлөрдү ачыктады.

«Биздин врачтар, волонтерлор дүйнөнүн бир дагы мамлекети COVID-19га даяр болбогондугуна карабастан, адамдардын өмүрүн сактап калууга болгон аракетин кылып жатты. Учурда медиктерди жазалоо, же жоопкерчиликти кимдир-бирөөгө оодаруу милдети турган жок. Биз саламаттык сактоо тутумун модернизациялоонун жана эпидемиялык абалга жооп кайтаруунун так планын иштеп чыгышыбыз керек. Бул белгилүү убакытты алаары түшүнүктүү, бирок аны азыртадан баштообуз зарыл. Бүгүнкү күндө негизги милдет катары аталган маселелерди чечүүгө тыкыр кадамдарды иштеп чыгуу эсептелет. Көзкарандысыз комиссияны түзүүнүн максаты – 2020-жылдын июнь – июль айларындагы түзүлгөн кырдаалдын себебин объективдүү талдоого алуу, ошондой эле келечекте ушундай окуялардын алдын алуу максатында конкреттүү чараларды жана сунуштарды иштеп чыгуу», - деп белгиледи премьер-министрдин милдетин аткаруучу.

Буга катар кеңешмеде саламаттык сактоо тутумун оптималдаштыруу маселеси көтөрүлдү.

«Бүгүнкү күндө биз көрүп тургандай, кабыл алынган кадамдар күтүлгөндөй ийгиликтүү болгон жок. Ошондуктан оптималдаштыруу маселеси Өкмөттүн ишинде комплекстүү түрдө каралышы абдан маанилүү. Ал бир нече базалык принциптерден турушу керек, анын катарында саламаттык сактоо тутумундагы санариптештирүү, саламаттык сактоо тутумунун алгачкы звеносунун калк үчүн жеткиликтүүлүгү, ошондой эле жарандар үчүн персоналдык камсыздоонун толук кандуу эсеби жана дарылоого жеткиликтүүлүк маселеси бар», - деп белгиледи Артем Новиков.

«Саламаттык сактоо тутумундагы моралдык климатты калыбына келтирүү, ошондой эле жарандарыбыз үчүн объективдүү маалыматты, анын ичинде COVID-19 каршы вакциналарды каттоо жана ташып келүү жаатындагы жүргүзүлүп жаткан иштер боюнча обьективдүү маалыматты жеткирүү маанилүү. Мен ЖМК аркылуу тийиштүү ишти жүргүзүүнү өтүнөм, алсак, COVID-19 программасынын алкагында биздин 1,2 млн жараныбыз үчүн сегиз түрдүү вакцинаны тандоо мүмкүнчүлүгү сунушталууда», - деп кошумчалады премьер-министрдин милдетин аткаруучу.

Премьер-министрдин м.а. бирдиктүү тутум аркылуу өлкөгө алынып келинүүчү дары-дармек каражаттарынын тизимин мындан ары санариптештирүү рынокту контрафакттык продукциядан коргоого мүмкүндүк берээрине басым жасады. Дары-дармек каражаттарын автоматтык каттоо жана кайрадан каттоо механизминин киргизилиши Дары-дармек каражаттар департаментиндеги коррупциялык схемаларды четтетүүгө мүмкүндүк берет.

Кеңешменини жыйынтыгы боюнча Кыргыз Республикасынын Саламаттык сактоо министрлигине ведомствонун мындан аркы натыйжалуу иши, ошондой эле иш-чаралардын тийиштүү планын кыска мөөнөттө киргизүүсү боюнча тийиштүү тапшырмалар берилди.

Пикир

Оставить комментарий