Бишкек, 26.05.23. /Кабар/. Жалал-Абад облустук көркөм сүрөт мектеп-интернатынын директору кол алдындагылардан системалуу түрдө акча талап кылгандыгы үчүн кармалды. Бул тууралуу Улуттук коопсуздук мамлекеттик комитетинен билдиришти.
Маалыматка ылайык, үстүбүздөгү жылы 24-майда УКМКнын кызматкерлери тарабынан аталган окуу жайдын директору Ч.Ч.А. 20 миң сом өлчөмүндө акча каражатын алып жаткан жеринен кармалды.
Көркөм сүрөт мектеп-интернатынын директору кызматка дайындалган учурдан тартып, башкача айтканда 2023-жылдын февраль айынан баштап ар кандай шылтоолор менен кол алдындагы кызматкерлерден айлык акыларынын бир бөлүгүн ага өткөрүп берүүгө мажбурлап келгени аныкталды.
Бул мектеп-интернаттын мугалимдеринин орточо маянасы 20 миң сомдун тегерегинде экендигин белгилей кетүү керек, анын 5 миң сомун директорго берип турууга аргасыз болушкан.
Ошондой эле буга чейин Ч.А.А. аныкталган мыйзам бузуулар үчүн жумуштан кетирем деп коркутуу жолу менен мектептин ашпозчусунан 17 000 сом алган.
Азыркы учурда тергөө иштери жүрүп жатат.
Пикир
Оставить комментарий