Эл аралык түрк маданияты жана мурасы фондунун президенти Литвага иш сапары менен барды

Бишкек, 16.03.23. /Кабар/. Эл аралык түрк маданияты жана мурасы фондунун президенти Гюнай Эфендиева Литва Республикасына иш сапары менен барды.

Иш сапардын алкагында ал Литва президентинин билим берүү, илим жана маданият боюнча кеңешчиси Вилма Бакиуте жана Литванынтышкы иштер министринин орун басары Йонас Сурвила менен жолугушту.

Жолугушуулардын жүрүшүндө Эл аралык түрк маданияты жана мурасы фонду менен Литва Республикасынын ортосунда кол коюлган кызматташтык жөнүндө Меморандумдун негизинде өз ара кызматташууну ийгиликтүү ишке ашыруу талкууланды.

Литванын аймагында жашаган түрк этникалык тектеги татар жана караим элдерине мамлекеттик деңгээлде көңүл буруунун маанилүүлүгү белгиленди. Мындай мамиленин айкын мисалы катары Литва Республикасында 2021-жылдын «Татарлардын тарыхы жана маданиятынын жылы» жана 2022-жылдын «Караимдердин тарыхы жана маданиятынын жылы» деп жарыяланышы баса белгиленди.

Литванын биринчи айымы Диана Науседиененин, Литванын тышкы иштер министри Габриэлиус Ландсбергистин фонддун президенти менен жолугушуусу, ошондой эле татар жана караим жылдарынын ачылышынын алкагында уюм тарабынан өткөрүлгөн иш-чараларга катышкандары талкууланды.

Талкуунун алкагында фонддун башка чет өлкөлөр менен, анын ичинде Европа мейкиндиги менен кызматташтыгы жогору бааланды.

Жолугушууларга Азербайжан Республикасынын Литва Республикасындагы Атайын жана Ыйгарым укуктуу элчиси Тамерлан Гараев, Литва Республикасынын Азербайжан Республикасындагы Атайын жана Ыйгарым укуктуу элчиси Эгидиус Навикас катышты.

Жолугушуулар Литва менен уюмга мүчө мамлекеттердин ортосундагы өз ара мамилелерди жана маданий алмашууларды активдештирүү багытында кызматташтыктын келечегин талкуулоо менен улантылды.

Эл аралык түрк маданияты жана мурасы фондунун президенти Гюнай Эфендиева Литвага болгон иш сапарынын алкагында Казакстандын Литвадагы элчиси Тимур Уразаев жана Түркиянын Литвадагы элчиси Барыш Тантекин менен жолугушту.

Жолугушууларда фонд менен уюмга мүчө мамлекеттердин ортосунда жалпы түрк маданиятын жана салттарын сактоо багытында тыгыз кызматташуунун маанилүүлүгү талкууланды. Түрк мамлекеттеринин жалпы мурастарын жана баалуулуктарын коргоонун жана аларды келечек муундарга өткөрүп берүүнүн маанилүүлүгү козголду.

Ар кайсы өлкөлөрдө жашаган аз сандагы түрк элдеринин Түрк дүйнөсүнө интеграцияланышынын жана бул багытта Фонд тарабынан ишке ашырылып жаткан чаралардын маанилүүлүгү баса белгиленди.

Фонддун чет мамлекеттер менен өнөктөштүгүнүн кеңейиши Түрк дүйнөсүнүн элдеринин ортосундагы жана чет өлкөлөрдөгү өз ара маданий алмашууларга кошкон салымы бааланды.

Сүйлөшүүлөрдүн жүрүшүндө фонддун негиздөөчү мамлекеттери болгон Казакстан жана Түркия менен кызматташуу мамилелеринин приоритеттери каралды, ошондой эле келечектеги пландар жана биргелешкен долбоорлор талкууланды.

Литвага болгон иш сапарынын алкагында Эл аралык түрк маданияты жана мурасы фондунун президенти Гюнай Эфендиева Тракай шаарында болуп, ал жерде кылымдар бою жашап келген литвалык караимдердин өкүлдөрү менен жолугушту.

Жолугушууда Фонд тарабынан Литва Республикасынын Азербайжандагы элчилиги менен биргеликте уюштурулган өлкөнүн расмий адамдарынын жана коомчулуктун өкүлдөрүнүн катышуусунда Караимдердин тарыхый жана маданий мурастарын жайылтууга багытталган бир катар иш-чаралар талкууланды.

Фонддун президенти Гюнай Эфендиева литвалык караимдердин белгилүү өкүлү, дипломат жана котормочу Галина Кобекайтеге түрк элдерин жакындатуудагы өзгөчө кызматы үчүн «Деде Коркут» сыйлыгын тапшырды.

Мындан тышкары, Гюнай Эфендиева Азербайжан Республикасынын Литва Республикасындагы элчилигинде уюштурулган татар коомчулугунун өкүлдөрү менен жолугушууга катышты. Жолугушууда Литва татарларынын тили, дини, фольклору, каада-салты, улуттук музыкасы, ырлары, ашканасы боюнча кеңири пикир алмашуулар болду. Мындан тышкары, элчиликте түрк элдеринин байыркы тарыхын, көп кылымдык улуттук-руханий баалуулуктарын чагылдырып, улуттук таттуулар менен Нооруз майрамдык дасторкон жайылды.

Шуша шаарын 2023-жылдын Түрк дүйнөсүнүн маданий борбору деп жарыялаганын эске алып, фонддун президенти Азербайжан Республикасынын Литва Республикасындагы Атайын жана Ыйгарым укуктуу элчиси Тамерлан Гараевге Шушанын символикасын чагылдырган эстеликке белек тапшырды.

Жолугушууларга Литва Республикасынын Азербайжан Республикасындагы Атайын жана Ыйгарым укуктуу элчиси Эгидиус Навикас катышты.