Бишкек, 15.05.23. /Кабар/. Бишкек мэри Эмилбек Абдыкадыров иш сапаранын алкагында таштанды полигонуна барды.
Муниципалитеттен билдиришкендей, түтүндү азайтуу максатында тигүү калдыктарын өрттөп жок кылуу үчүн атайын жай бөлүнгөн.
"Мындан тышкары, дөңгөлөктөрдү, ошондой эле бутактарды, жалбырактарды жана башка аларга байланыштуу күйүүчү таштандыларды катуу таштандылардан бөлүп алуу иштери жүргүзүлгөн. Өрт коркунучу бар таштандыларды өзүнчө сактоо боюнча эсепке алуу күнү-түнү көзөмөлгө алынып, өрттүн алдын алуу жана өзүнөн-өзү күйүүнү өз убагында өчүрүү максатында күзөт уюштурулган. Ошондой эле "Эхитусфирма" ААКсы менен сүйлөшүүлөрдүн негизинде күйүүчү калдыктардын ар бир бөлүгүнө өзүнчө сактоочу жайлар изделүүдө", - деп айтылат маалыматта.
Учурда "АБК Голд" ЖЧКсы тарабынан Бишкек шаардык таштанды таштоочу жайдын периметрине тосмо орнотуу иштери аяктады.
Белгилей кетсек, "Бишкек шаарынын катуу тиричилик калдыктарын башкаруу системасын жакшыртуу" долбоорунун алкагында түндүк тарабында тор тосмолор орнотулган. Катуу тиричилик калдыктарын башкаруу долбоорунун алкагында бардык объектилер жана иштер тапшырылгандан кийин курулуш аяктайт. Андан кийин полигондун бардык аймагы бүткүл периметри боюнча тосулат.
Пикир
Оставить комментарий