Бишкек, 13.10.22. /Кабар/. Ош шаарынын биринчи вице-мэри Марс Исаев башында турган мэриянын делегациясы “Бириккен шаарлар жана жергиликтүү бийликтер” уюмунун бүткүл дүйнөлүк конгрессине катышууда. Бул тууралуу мэриянын басма сөз кызматы билдирет.
Маалыматка ылайык, иш-чара 10-октябрдан 14-октябрга чейин Кореянын Тэджон шаарында өтүп жатат. Делегациянын курамында Ош шаардык кеңешинин депутаттары Шахназар Бакир уулу, Кушбак Шайиев, Бакай Жолдошбаев жана Алмаз Иминджанов бар.
Конгресстин программасында тегерек столдор, пленардык сессиялар, талкуулар, тренинг-семинарлар, ошондой эле Тэджон шаарынын тажрыйбасы жана маданияты менен тааныштыруу камтылган.
Марс Исаев Конгресстин пленардык жыйынында сөз сүйлөп, анда бул конгрессти өткөрүүнүн уюмдун курамына кирген шаарларды өнүктүрүү үчүн маанисин белгиледи. Ошондой эле, Ош шаарынан келген делегация “Бириккен шаарлар жана жергиликтүү бийликтер” уюмунун бүткүл дүйнөлүк кеңешинин жаңы курамына жана Евразиянын жергиликтүү жана аймактык бийлик органдарынын кызыкчылыктарын коргоо үчүн жетекчилик кызматтарга талапкерлерди шайлоого катышты. Ош шаары уюмга толук кандуу мүчө катары 2008-жылдан бери добуш берип келет.
Сапардын алкагында ошондой эле маданият, искусство, жаратылыш, илим жана техника менен байланышкан ар кандай мекемелерге баруу жана экскурсиялар уюштурулган.
Пикир
Оставить комментарий