Бишкек, 22.06.18. /Кабар/. Түркмөнстандын Ашхабад жана Мары шаарларынын мектеп мугалимдери быйыл президент Гурбангулы Бердымухамедовдун туулган күнүнүн алдында белгиленгени жаткан түркмөн классиги Магтымкулинин поэзия күндөрүнө даярдык көрүү иштерине тартылууда.
Бузмеин шаарында иштеген аты-жөнүн билдиргиси келбеген мугалимдердин биринин айтымында, акыркы бир нече күндөн бери дээрлик бардык мамлекеттик мекемелердин кызматкерлери майрамдык иш-чараларга даярдануу үчүн Ашхабадга барууда.
«Азыр эмгек өргүүсүнө чыккан мугалимдерге да тынчтык бербей жатышат. Күн сайын таңкы төрттө туруп, 25 чакырым жөө басып Ашхабадга барууга туура келип жатат. Анткени иш-чараларга даярдыктар борбордогу сейил бактар менен маданий жайларда өтүп жатат. Үйгө чарчап, бутубузду араң тартып келип жатабыз. Үй иштерине, балдарды тарбиялап, азык-түлүк сатып алууга убакыт жетпей калып жатат», — деди ал.
Мары шаарынын жашоочулары калаанын жана ага жакын жайгашкан айылдардын мугалимдери концерттик залда өтүп жаткан даярдык иштерине катышууга милдеттендирилгенин билдиришти.
Көп жылдардан бери 18-майда белгиленип келген Кайра жаралуу, биримдик жана Махтумкулинин поэзия күнү парламентинин демилгеси менен быйыл алгачкы жолу 27-июнда, Түркмөнстандын маданият жана искусство ишмерлеринин күнүндө белгиленгени турат. 29-июнда болсо өлкөдө президент Гурбангулы Бердымухамедовдун туулган күнү белгиленет.
Пикир
Оставить комментарий