Кыргызстанда сутка ичинде 13 өрт кырсыгы катталды

Бишкек, 01.08.22. /Кабар/. Кыргызстанда сутка ичинде 13 өрт кырсыгы катталып, өрттү өчүрүүгө 14 бөлүм тартылган. Бул тууралуу Өзгөчө кырдаалдар министрлигинин басма сөз кызматы билдирет.

Маалыматка ылайык, Бишкек шаарында 4, Ош шаарында 1, Чүй облусунда 1, Жалал-Абад облусунда 5, Ош облусунда 1, Баткен облусунда 1 өрт кырсыгы катталды.

Ош облусунун Араван районундагы Зеленый мост айылында турак үйдүн бөлмөсүнүн 15 чарчы метр жыгач полу жана төшөктөр күйгөн. Өрттүн себеби такталууда.

Жалал-Абад облусунун Базар-Коргон районундагы Арстанбап айылында жалпы аянты 168 чарчы метр болгон жыгач устундуу тунике менен жабылган сарай толугу менен жана 300 түк чөп, 3 тонна бош чөп күйгөн. Өрттүн себеби такталууда