Бишкек, 26.04.23. /Адил Төлөгөнов - Кабар/. Акжол Махмудов Иван Поддубныйдын балбандар лигасынын (PWL – 4) мелдешинде россиялык Роман Власов менен күрөштү.
Спорттук иш-чара 26-апрелде Казакстандын Алматы шаарындагы спорт ордосунда өттү.
Махмудов менен Власов грек-рим күрөшү боюнча 77 кг салмакта күч сынашты. Эки балбан тең атаандашына белин алдырбай 1:1 эсебинде күрөштү аяктады. Акыркы упайды Акжол Махмудов алганы үчүн жеңиш ага берилди.
Белгилей кетсек, Акжол Махмудов грек-рим күрөшү боюнча дүйнө чемпиону жана Олимпиада оюндарынын күмүш байгесинин ээси, ал эми Роман Власов дүйнөнүн үч жолку жана Олимпиаданын эки жолку чемпиону.
Аталган турнирде Жоламан Шаршенбеков грек-рим күрөшү боюнча 60 кг салмакта россиялык Динислам Бамматовду 7:2 эсебинде жеңип алды.
Эскерте кетсек, Иван Поддубныйдын балбандар лигасы (PWL) 2022-жылдын май айында түзүлүп, анын биринчи мелдеши Россиянын “ЦСКА” футболдук клубунун машыгуу аянтчасында, экинчиси Москванын Вернадский мамлекеттик циркинде өткөн. Үчүнчүсү Бишкекте өтүп, кыргызстандык үч балбан күрөшкөн.
Аталган мелдеште 10дон ашык өлкөдөн 1 миңдей балбан күчүн сынайт.
Пикир
Оставить комментарий