Бишкек, 09.11.23. /Кабар/. Апийим сабагы түрүндөгү баңгизатын мыйзамсыз алып өтүүгө бөгөт коюлду. Бул тууралуу Улуттук коопсуздук мамлекеттик комитетинен билдиришти.
Маалыматка ылайык, республиканын аймагында коррупциянын көрүнүштөрүн жоюу, контрабанда жана көмүскө каражаттарды легалдаштыруу менен алектенген трансулуттук кылмыштуу топтордун аракеттерин аныктоо жана бөгөт коюу боюнча жүргүзүлүп жаткан пландуу иш-чаралардын жүрүшүндө, “Манас” эл аралык аэропорту аркылуу туруктуу контрабандалык баңгизаттарды ташып келүү иштери аныкталып, жок кылынды.
Кыргызстандын жарандарынын ичинен жеке ишкерлер мыйзамсыз материалдык байлыктарды алуу максатында жакынкы жана алыскы чет өлкөлөрдөн өлкөгө баңгизаттарды мыйзамсыз алып өтүүнүн туруктуу схемасын уюштурушканы аныкталды.
УКМК тарабынан “Манас” аэропортунун бажысы менен биргеликте жалпы салмагы 24 тонна 350 кг кондитердик апийим түрүндөгү жүк, анын ичинде болжол менен 7-8 тонна көкнар (апийим сабагы) аныкталып, ага бөгөт коюлду.
Жогорудагы фактылардын негизинде, КР Кылмыш-жаза кодексинин 285-беренеси ("Кыргыз Республикасынын бажы чек арасы аркылуу өткөрүүнүн өзгөчө эрежелери белгиленген буюмдарды контрабандалык жол менен алып өтүү") боюнча КР 2 жараны жана коңшу өлкөнүн бир жараны кармалды.
Алынган баңгизаттар тиешелүү органдарга экспертиза жүргүзүү үчүн өткөрүлүп берилди.
Пикир
Оставить комментарий