Бишкек, 14.07.23. /Кабар/. Экономика жана коммерция министрлигинде Кыргызстандын биринчи бизнес-омбудсмени Робин Орд-Смиттин элесине арналган иш-чара болуп өттү.
Экономика министрлигинен билдиришкендей, Робин Орд-Смиттин эстелик тактасынын ачылыш аземине министрлер кабинетинин төрагасынын орун басары Эдил Байсалов, экономика жана коммерция министри Данияр Амангелдиев, Улуу Британиянын Кыргызстандагы элчиси Николас Боулер, дипломатиялык корпустун жана башка мамлекеттик органдардын өкүлдөрү катышты.
Министр Амангелдиев Кыргызстандын биринчи бизнес-омбудсмени Робин Орд-Смиттин урматына эстелик тактанын ачылышына арналган бүгүнкү салтанаттуу иш-чаранын катышуучуларын куттуктады.
Ал белгилегендей, Робин Орд-Смит Кыргызстандын тарыхында 2019-жылдан 2022-жылга чейин Кыргызстандын ишкердик субъекттеринин укуктарын, эркиндиктерин жана мыйзамдуу кызыкчылыктарын коргоо боюнча ыйгарым укуктуу адам – Кыргызстандын биринчи бизнес-омбудсмени болуп калды.
"Робин Орд-Смит өзүнүн ишинин жүрүшүндө Кыргызстандын бизнесинин укуктарын жана кызыкчылыктарын коргоого, ошондой эле Кыргызстан менен Улуу Британиянын жана башка өлкөлөрдүн ортосундагы эки тараптуу мамилелерди өнүктүрүүгө чоң салым кошкон. Кыргызстандын жарандарына ар тараптан колдоо көрсөтүп, жардам көрсөтүп, министрлик тарабынан өткөрүлгөн иш-чараларга активдүү катышкан", - деп белгиледи министр.
Ошондой эле иш-чарада сөз сүлөгөн министрлер кабинетинин төрагасынын орун басары Эдил Байсалов Робин Орд-Смит бизнес-омбудсмен кызматында кыска мөөнөттүн ичинде өз максатына кынтыксыз болгондугун белгиледи.
"Бүгүн биз Кыргызстандын биринчи бизнес-омбудсмени, кыргыз элинин чыныгы досу Робин Орд-Смиттин жаркын элесин эскеребиз. Улуу Британиянын Кыргызстандагы элчиси катары республиканын экономикасынын өнүгүшүнө салым кошкон. Ушундай урмат менен кыргыз элин, кыргыз жерин сүйгөн. Элчиликтеги ишин аяктагандан кийин ал өзүнүн мурдагы максаттарын ишке ашыруу үчүн Кыргызстандын бизнес-акыйкатчысы кызматына талапкерлигин койгон. Сынакка катышып, оор талаптарга карабай жеңишке жетишти.
Кыргызстандын биринчи бизнес-акыйкатчысы болуу менен ал өзүнүн бардык күчүн акыйкатчы институтун түзүүгө жумшаган. Пандемия маалында бул ооруну жеңип, башкаларга жардам берүү менен өзүнүн эрдигин көрсөтө алган. Маркум Робин Орд-Смиттин элеси биздин жүрөгүбүздө ар дайым жашайт», - деп жыйынтыктады өз сөзүн Байсалов.
Белгилей кетсек, Робин Орд-Смит Кыргызстандын биринчи бизнес-омбудсмени болуп шайланган, ал өз кызматында экономикалык өнүгүүгө, жеке менчикти коргоого жана Кыргызстандын инвестициялык жагымдуулугун көтөрүүгө ак ниеттүүлүк менен кызмат кылган. 2022-жылдын сентябрында Робин Орд-Смит оорудан кийин капысынан каза болгон.
Пикир
Оставить комментарий