Бишкек жана Циндао шаарларынын башчылары кызматташтыкты талкуулады

Бишкек, 15.06.23. /Кабар/. Кытайдын Циндао шаарында Бишкек мэрм Эмилбек Абдыкадыров менен Циндао шаарынын мэри Чжао Хаочжинин жолугушуусу өттү.

Муниципалитеттен билдиришкендей, жолугушуунун максаты Бишкек жана Циндао шаарларынын ортосундагы эки тараптуу кызматташтыкты талкуулоо жана чыңдоо, ошондой эле алардын ортосундагы бир тууган шаар мамилелерин өнүктүрүү мүмкүнчүлүктөрүн изилдөө болуп саналат.

Жолугушууда Бишкек мэри шаарларды өнүктүрүү, инфраструктуралык долбоорлорго инвестиция тартуу, маданият жана билим берүү сыяктуу түрдүү тармактарда кызматташуунун маанилүүлүгүн белгиледи.

Тараптар шаар куруу, инфраструктураны өнүктүрүү жана жашоого ыңгайлуулукту жана туруктуулукту жакшыртуу үчүн экологиялык чаралар боюнча пикир алмашты.

Жолугушуунун соңунда мэрлер мындан ары кызматташуунун потенциалдуу мүмкүнчүлүктөрүн изилдөө жана талкууланган демилгелерди ишке ашыруу боюнча конкреттүү иш пландарды иштеп чыгуу үчүн топторду дайындоого макулдашты.

Маалымдама: Бир тууган шаар мамилелерин түзүү боюнча келишимге 2021-жылдын 22-декабрында кол коюлган. Ошондой эле Циндао өкмөтү Дэн Сяопин проспектисиндеги паркты жакшыртуу үчүн 600 000 юань грант бөлгөн.