Бишкек, 12.07.18. /Кабар/. Кыргыз Республикасынын Президенти Сооронбай Жээнбеков бүгүн, 12-июлда Талас районундагы "Манас-Ордо" улуттук комплексине баруу менен өзүнүн Талас облусу боюнча жумушчу сапарын баштады. Бул тууралуу президенттин аппаратынын маалыматтык саясат бөлүмү билдирди.
Андан соң мамлекет башчысы Талас районундагы Таш-Арык айылынын балдар бакчасынын курулушу жана Тараз-Талас-Суусамыр авто жолун реконструкциялоо долбоорун ишке ашыруунун жүрүшү менен таанышты. Бул долбоорлор боюнча маалыматты КР Өкмөтүнө караштуу Архитектура, курулуш жана турак-жай-коммуналдык чарба мамлекеттик агенттигинин директору Бактыбек Абдиев жана КР транспорт жана жолдор министри Жамшитбек Калилов беришти.
Жумушчу сапарынын алкагында Сооронбай Жээнбеков Чынгыз Айтматовдун айылы Шекерге барып, андагы "Чынгыз-Ордо" маданий-тарыхый мемориалдык музей-комплексин куруунун жүрүшү менен таанышат.
Президент ошондой эле облустун тургундары менен жолугушат. Агрардык, социалдык чөйрөлөрдөгү абал менен жана региондун транспорттук инфраструктурасын жакшыртуу боюнча иштин жүрүшү менен таанышат.
Маалымат иретинде:
Таш-Арык айылындагы жалпы наркы 57 миллион 339 миң 442 сомдук 140 орундуу балдар бакчасынын курулушу быйыл, 2018-жылы аяктайт.
Азия Өнүктүрүү Банкы донор болуп эсептелген Талас облусун бүт камтыган Тараз-Талас-Суусамыр автожолун реконструкциялоо долбоорунун 3-фазасы 2018-жылы аяктайт. Бул долбоордун кийинки 4-фазасы 2019-жылы башталат, анын алкагында Казакстандын Тараз шаарына чейинки жол реконструкцияланат.
Пикир
Оставить комментарий