Бишкек, 27.11.23. /Кабар/. Өзгөн районунда көрүнүктүү мамлекеттик жана саясий ишмер Койчу датка Жаман бий уулунун айкели орнотулду. Бул тууралуу Жогорку Кеңештен билдиришти.
Маалыматка ылайык, иш-чарага депутаттар Улугбек Ормонов, Бактыбек Сыдыков, Элмурза Сатыбалдиев, Медербек Саккараев, Мурадил Сыдыков, Бактыбек Чойбеков, Бахридин Шабазов жана Чынберди Төлөновдор катышты.
Бишкек-Ош унаа жолунун Өзгөн районундагы бөлүгүндө жол жээгинде орнотулган айкелдин ачылуу аземине жергиликтүү бийлик өкүлдөрү, айыл тургундары жана республиканын ар кыл облустарынан келген коноктор келишкен.
Иш-чарада тарыхчылар Койчу датка тууралуу чогулгандарга кеңири маалымат берип, архивдерден табылган тарыхый маалыматтар менен бөлүштү.
Маалыматтарга ылайык, эл алдында көрүнүктүү кызмат өтөгөн, эл эсинде сакталып келген белгилүү инсандардын бири - парваначы Койчу датка Жаман бий уулу (1812-1868) тарых барактарында өз орду бар мамлекеттик саясий ишмер болгон. Кокон хандыгынын саясий тарыхында таасирдүү роль ойногон Койчу датка Шааркан, Ташкент шаарларынын бектин кызматын да аркалаган.
Пикир
Оставить комментарий