Бишкек, 11.04.21. /Адил Төлөгөнов - Кабар/. Саат 12:00гө карата жергиликтүү кеңештерге депутаттарды шайлоого 445 миң 533 жаран добуш берди. Бул тууралуу БШКнын төрайымы Нуржан Шайлдабекова билдирди.
Анын айтымында, ал жалпы шайлоочулардын 13,43%ын түзөт.
“Шаардык кеңештерге 133 миң 116, айылдык кеңештерге 312 миң 417 шайлоочу тандоосун кылды”, - дейт ал.
Эскерте кетсек, Кыргызстанда жергиликтүү кеңештерге депутаттарды шайлоо жана референдумга добуш берүү жүрүүдө. Добуш берүү үчүн өлкө аймагында 2 миң 483, чет өлкөлөрдө 48 шайлоо тилкеси түзүлгөн.
Кыргызстанда 28 шаардык кеңешке 796 депутат, 420 айылдык кеңешке 7 миң 560 депутат шайланат. Жергиликтүү кеңештерге добуш берүү үчүн тизмеге 3 млн 318 миң 130 жаран, референдумга добуш берүү үчүн тизмеге 3 млн 606 миң 201 жаран киргизилген.
Пикир
Оставить комментарий